– Tala er gode – Stor-Oslo

På tradisjonsrike Lorry i Oslo er det knapt ein ledig plass igjen før jul.

Dagleg leiar Jan Olof Andersson fortel at julebordssesongen er i full gong.

– Vi ligg an til å auke med 3–4 prosent fleire gjester enn i fjor. Vi har plass til 500 gjester kvar kveld fordelt på to bordsettingar, seier Andersson.

Han legg til at det aller viktigaste med julebordet er menneska.

– Det skal vere eit hyggeleg lag med mat og drikke.

Verken hos Statholdergaarden eller Theatercaféen er det særleg med ledige plassar igjen før jul.

– Vi trur dette blir eitt av våre beste år, seier restaurantsjef Edvard Skramstad hos Statholdergaarden.

Fulle bestillingar før jul er gode nyheiter for ein hardt pressa restaurant- og utelivsbransje.

Oslo er nemleg ein av fleire byar som har vore hardt ramma av dyrtida det siste året.

Utelivsaktørar fortel at folk legg igjen mindre pengar når dei er ute, samtidig har driftskostnadene auka.

Både utestader og bryggeri tar grep for å overleve.

Ifølge proff.no har 426 serveringsstader gått konkurs eller blitt tvangsavvikla i Noreg hittil i år.

På same tid i 2023 var talet 289.

Gode tal i Bergen

Desember er derfor nettopp ein etterlengta opptur for utelivet.

I Bergen er julebordssesongen godt i gang.

Tre av fire julebordsarrangørar NRK har kontakta, melder om god eller auka julebord-booking i år, trass i dyrtid med høge renter og høg prisvekst.

Ved Scandic Hotel Noreg fortel direktør Tore Espenes at dei opplever ei rekordhøg booking.

– Heile november og desember er all time high når det gjeld julebord. Vi er veldig fornøgde. Særleg store bedrifter er standhaftige og fortset å bestille, seier han.

Hos Quality Hotel Edvard Grieg er også optimismen stor.

– Vi har selt 4500 billettar til julebordsshowet vårt, og det har vore utselt i ein månad, seier direktør Kjetil Røed.

Men ikkje alle opplever same pågang.

Ved Radisson Blu Royal Hotel på Bryggen, ser hotellsjef Thomas Dahl ein liten nedgang i julebordsbestillingane.

– Tolkar de nedgangen i bestillingar som ein effekt av dyrtid?

– Ja, det gjer vi absolutt. Nokre av desse kundane seier dei vel å ikkje halde julebord i år på grunn av dyrtida som går føre seg. Nokon seier dei utset julebordet til januar.

NHO: Fleire skal på julebord

– Det verkar som det er god kok enten det er store stader eller litt mindre stader, seier Tobias Strandskog-Christensen, politisk rådgivar i NHO Reiseliv.

57 prosent av nordmenn planlegg å gå på julebord i år. I fjor var 49 prosent på julebord, ifølge NHO Reiselivs årlege julegallup.

Auken kan komme av at undersøkinga i år også inkluderer julebord med venner og familie.

– Fleire tar bookinga litt seinare. Det har på ein måte vore ein litt tregare november, seier han.

– Nå ser ein at tempoet er i ferd med å bli tatt opp.

Strandskog seier at mange, både bedrifter og kundar, merke dyrtida veldig.

– Ein har sett gjennom heile året at gjestene møter opp like mykje som før, men at ein bruker mindre pengar per besøk.

Han seier at for mange bedrifter er driftsmarginen så låg, at det ikkje er mange kroner som avgjer om ein går med under- eller overskot.

– Så det at desembermånaden nå går bra, er utruleg viktig. Men heldigvis nå så ser vi at tala er gode, så vi er veldig optimistiske.

Han seier at dei har tatt stikkprøver blant dei 4000 medlemsbedriftene. I tillegg har dei gjorde medlemsundersøkingane.

– Dei viser at det er gode tal. Absolutt. Så det er enten forventa til å bli det same som i fjor, eller enda betre.

Men i år bruker arbeidsgivar mindre pengar på dei tilsette.

– Alkohol er dyrt, og det er eit produkt som også har veldig høge avgifter.

Nedgang i Stavanger

Men i Stavanger er ikkje folket like festglade som i Oslo og Bergen.

På Solastranden gard merkar dagleg leiar Vegard Årsvold ein nedgang.

– Vi har fylt opp stort sett alle helgane, men selskapa er ikkje så store som dei ein gong var, seier han.

Han merkar at tilsette i bedrifter er dårlegare til å melde seg på julebordet.

– Det er mange som synest det er dyrt, seier han.

Ved Hotel Victoria fortel dagleg leiar Monika Sandvold at sesongen har starta seinare enn vanleg.

– Tidlegare har vi hatt første julebord første helga i november. Nå begynte det ordentleg frå tredje helga, seier ho.

– Mange bedrifter inviterer ikkje med følge lenger, men bruker heller meir pengar på menyen og underhaldninga, seier Sandvold.