Regjeringa doblar antal studieplassar på etterutdanning i praktiske og estetiske fag – NRK Rogaland – Lokale nyheter, TV og radio

– Eg lærer å vere meir kreativ og gjere meir fysiske ting med hendene. Det får eg ikkje gjort i mange andre fag, seier Sofie Skår Ellingsen.

15-åringen går i 10B på Stangeland ungdomsskule i Kopervik på Karmøy.

I hendene har ho garn og heklenål. Og snart ei ferdig handveske.

Venninna Lina Olsen-Sund har laga eit fat i leire som skal brennast og glaserast.

Og han som har det overordna ansvaret heiter Vidar Jacobsen Stueland.

– Kunst og handverk er det kjekkaste faget som finst. Det og musikk! Her kan du snakke og le. Du får eit heilt anna og godt forhold til elevane, seier han.

Men ein treng ikkje fagkompetanse for å undervise i praktiske og estetiske fag i barneskulen. På ungdomstrinnet er kravet minst 30 studiepoeng.

Det er kanskje difor ein rapport frå Statistiske sentralbyrå, SSB, viser at rundt halvparten av alle lærarar som underviser i desse faga har null studiepoeng i dei.

Men det vil regjeringa gjere noko med.

Meiner skulen er for teoretisk

– Norsk skule har over for lang tid blitt altfor stillesittande og altfor teoretisk, meiner kunnskapsminister Kari Nessa Nordtun.

Difor vil regjeringa løfte kompetansen og legg opp til at minst 1000 lærarar kan få tilbod om etterutdanning i praktiske og estetiske fag i år.

Det er 400 fleire enn i fjor.

– Kompetansen i desse faga har ikkje blitt satsa nok på. Vi treng ein meir praktisk skulekvardag, seier ho.

Rektor på Gosen skule i Stavanger, Anne Marthe Nygård Basso, er svært positiv.

– Særleg innanfor musikk har det vore få som har tatt etterutdanning. Og ikkje minst i kunst- og handverksfaget som er eit veldig viktig fag i skulen, seier ho.

Hadde null studiepoeng

Vidar Jacobsen Stueland var ein av dei med null studiepoeng i kunst og handverk då han byrja å undervise i faget.

– Det var kjempeskummelt. Eg hadde berre sett keramikk på fjernsyn, seier han.

Læraren tar nå etterutdanning i kunst og handverk og meiner det er viktig å få opp andelen som har fagkompetanse i desse faga.

– Det er ganske mange timar som er sett av i timeplanen i løpet av grunnskulen. Då er det svært dumt at ein berre set inn ein lærar som eigentleg ikkje har så mykje kompetanse.

Elevane synest også det er viktig at læraren får den kompetansen.

– Då lærer dei seg nye ting som dei kan lære oss å gjere, seier Lina Olsen-Sund.