Fikk kjeft for billig gang- og sykkelsti. Nå tar Rogaland fylkes­kommune inspirasjon av løsningen – NRK Rogaland – Lokale nyheter, TV og radio

– Det gjekk heilt fint inntil det blei slått stort opp i aviser, og dei i Oslo fann ut kva som hadde skjedd. Då blei det sjau.

Håkon Undheim minnest godt rabalderet han starta for fire år sidan.

På Undheim hadde dei venta i 30 år på gang- og sykkelsti, og nå ville dei ikkje venta lenger.

Fire mannfolk møtte opp i «uteståvå» til Håkon, med ein plan: Dei skulle gjera jobben sjølve, på dugnad.

– Me brukte vel ein time på å bestemma oss, fortel Olav Taksdal, som er bonde og har gitt løyve til at turstien kan gå på jordet sitt.

Nokre månader seinare stod stien klar. Til glede for bygdefolket, men ikkje for alle dei som bestemte.

I ettertid fekk initiativtakarane kraftig kritikk for manglande søknad, for at tryggleiken for brukarane ikkje var god nok og for at stien var vanskeleg å halde ved like.

Men dei hadde støtte hos ordførar og politikarar i kommunen, og etter nokre utbetringar og forhandlingar har stormen lagt seg.

Fleire gjer som Rogaland

– Me har nok blitt inspirert av det som skjedde på Undheim, vedgår Lasse Anfinsen Fredheim. Han er leiar i Samferdsleutvalet i Rogaland.

Rogaland fylkeskommune vil undersøkje om det er råd å byggje billegare enn dagens standard.

Derfor har dei starta eit pilotprosjekt der målet er å få ned kostnadane med å bygge gang- og sykkelstiar. Spesielt i område der innbyggjartalet er ganske lågt.

Strekninga som er vald ut er på Finnøy i Stavanger.

Både Vestland og Innlandet fylke har tidlegare undersøkt det same. Dei har kome med innspel til Rogaland, og skal etter kvart få presentert resultata av pilotprosjektet. Rogaland har sett av femten millionar kroner på budsjettet fram til 2027.

– Kanskje kan vegen vera smalare enn nåverande standard? Kanskje skal grunnarbeidet gjerast enklare, undrar Anfinsen Fredheim.

Trafikkfarleg på Finnøy

– Dei fleste foreldra lar ikkje ungane sine få lov å gå eller sykle opp hit sjølv, fortel Bendik Heggelund, leiar i Finnøy Idrettslag.

På Finnøy i Stavanger ligg fotballbanen Leikvoll eit par kilometer frå øya sitt sentrum. På den siste kilometeren er det 60 kilometer fartsgrense og smal veg.

Kvar ettermiddag i vekedagane nærmar det seg kaos, når foreldra køyrer ungane til og frå fotballtrening.

– Vegen er uoversiktleg. I tillegg er det industri i området som nyttar vegen forbi idrettsanlegget, seier Heggelund.

Likevel hadde han slått seg til ro med situasjonen, og rekna med at det blei for dyrt å bygge ein gang- og sykkelsti.

Undheim-modellen

Turvegen på Undheim, som er det offisielle namnet, er 2.400 meter lang. Rekninga kom på 2.8 millionar kroner inklusive utelysa. Det var rekordbilleg.

Prisen på ein meter med ny gang- og sykkelsti, ifølge Statens vegvesen, varierer mellom 10.500 og 20.000 kroner. Då er ikkje lysanlegg inkludert.

Alt er betre enn i dag

– Eg vil tru at spesielt foreldra ser fram til at dei ikkje lengre må stille opp med bilkøyring for å få ungane på trening, seier Bendik Heggelund.

Han er skråsikker på det blir ein merkedag i bydelen, den dagen pilotstien til Leikvoll står ferdig.

–Sjølv om den sikkert blir både smalare og meir svingete enn standarden i dag, seier Heggelund.