Dei siste åra ønsker fleire og fleire seg kolonihage i Stavanger. Det er fire kolonihagar i byen, og nå står nær 500 på venteliste for å få plass.
– Det begynte jo under korona, og så har det berre tatt seg opp. Eg trur folk har begynt å tenke litt på sjølvberging. Det er ikkje alle som har hage heime, seier André Meling, leiar i fellesstyret for kolonihagane i Stavanger.
Han seier også at køen har auka ytterlegare etter krigen i Ukraina starta.
Mange har parsellen i kolonihagen som ein prydhage, men ifølge Meling er det fleire og fleire som dyrkar nyttegrønsaker.
Kolonihagar er anlegg på kommunal grunn der ein har hage og små hytter. I andre land er det ikkje hytter, ifølge Store Norske Leksikon.
I Noreg er om lag 2000 kolonihageparsellar, medan det er 26.000 i Sverige og 40.000 i Danmark. Tyskland og Polen er dei store kolonihagelanda med om lag ein million i kvart land.
