Kronprinsen opnar nye Stavanger universitetssjukehus – NRK Rogaland – Lokale nyheter, TV og radio

– Sjukehus er viktige i alle menneske sine liv. Det er staden for dei glade, vanskelege og avgjerande augeblikka. Når vi byggjer sjukehus, så byggjer vi også samfunn.

Slik opna kronprinsen talen sin i dag.

– Takk til alle som har bidratt inn i dette store arbeidet. Til planleggjarane, til byggarane, til tilsette, samarbeidspartnarar og brukarar. Med dette erklærer eg Stavanger universitetssjukehus på Ullandhaug som opna.

Rundt 125.000 kvadratmeter med sjukehus stod klart då nye Stavanger universitetssjukehus (SUS) opna for drift den 16. november.

Sjukehuset har tatt sju år å byggje, og har kosta over 12 milliardar kroner.

Sjølv om dei første pasientane flytta inn i november, er det først i dag at det er offisiell opning.

Det var kronprins Haakon som fekk lov til å klippe bandet i opningsseremonien for det nye sjukehuset.

Kronprinsen deltar også på ei omvising på barne- og ungdomsmottaket, akuttmottaket og nevrologisk avdeling ved sjukehuset.

Helsetenester i verdsklasse

– Befolkninga i Sør-Rogaland har fått eit moderne sjukehus og eit moderne bygg. Men kanskje aller viktigast, dei aller beste fagfolka i tenesta vår, sa helse- og omsorgsminister Jan Christian Vestre.

– Her skal dei få helsetenester i verdsklasse, sa ha vidare.

Saman med kronprinsen og helseministeren, tala også administrerande direktør Helle Schøyen ved opninga i dag.

Betaler ein halv milliard i renter

Bak opninga i dag står eit omfattande byggarbeid, som har kosta store summar.

Sjukehuset har no ei gjeld på 11,2 milliardar kroner. Berre rentene kostar årleg ein halv milliard kroner.

På toppen kjem endå eit lån på 1,4 milliardar kroner for å starte opp med byggetrinn 2.

Byggetrinn 2 skal samle all pasientbehandling på det nye sjukehuset på Ullandhaug. No ligg mykje av drifta framleis igjen ved det gamle sjukehuset på Våland. Berre kring 5 kilometer unna.

Eigentleg skulle heile sjukehuset vere samla på ein stad innan 2030, men finansieringa for byggjetrinn 2 har vore usikker og er for tida sett på pause.

I oktober låg SUS nærmare 200 millionar kroner bak budsjettet for 2025, og har innført streng tilsettingskontroll.

I dag skal sjukehusleiinga halde eit ekstraordinært styremøte om situasjonen.