Hovudbry for Viking i gullstriden i Eliteserien – fotballekspert Carl-Erik Torp har eit klart råd – NRK Rogaland – Lokale nyheter, TV og radio

– Viking er inne i ein hektisk periode med viktige kampar som kjem veldig tett, seier NRK sin fotballekspert, Carl-Erik Torp.

Etter 3-1-tapet mot Aston Villa i Meisterligaen onsdag kveld, står nøkkelkampane i kø for fjorårets seriemeistrar frå Stavanger.

Søndag kjem Tromsø til Jåttåvågen, medan det blir gullkamp mot Bodø/Glimt i Bodø neste fredag (30. oktober).

Berre fem dagar seinare ventar overraskingslaget Sabah FK i Meisterligaen – eit lag Viking bør ha tre poeng mot om dei skal ha håp om vidare avansement i verdas gjevast klubbturnering.

– Eg er ikkje i tvil om kva eg meiner er viktigast. For meg så må Viking prioritera Eliteserien. Dersom dei ikkje gjer jobben der, er Meisterligaen eit eingongseventyr, seier Torp.

– Inngangen til det Viking opplever i Europa er seriegullet i fjor, og det trur eg dei skjønar sjølv også. At dei må gjera jobben i serien. Men dei kjempar mot eit frykteleg godt Bodø/Glimt-lag, så det blir ein intens innspurt, held NRK-eksperten fram.

– Nytt for Viking

To seriegull på rad vil stikka seg veldig fram i den lange historia til Viking, ifølge Torp.

– Blir det eit dilemma når dei møter Sabah i neste kamp i Meisterligaen, som dei bør vinna mot for å ha ein sjanse for avansement?

– Ja, og dette er er jo noko som er litt nytt for Viking. Det blir spanande å sjå korleis dei handterer det. Dei har ein brei stall, men bruker kanskje litt for lite av den, og kanskje kvaliteten er for dårleg totalt sett.

NRK-eksperten peikar på at Bodø/Glimt stod overfor same dilemma i fjor, då Viking ikkje spelte i Europa.

– Balansen mellom serie og Meisterliga blir ein nøkkel. Det å klara å vera skikkeleg konkurransedyktig på to arenaer samtidig. Kampane kjem så tett dei neste vekene at det kjem til å bli ei ekstrem påkjenning.

– Heimleg liga er viktigast

Henrik Bjørdal har vore ein bauta og særs viktig bidragsytar for Viking etter overgangen frå Vålerenga.

Mot Aston Villa i Birmingham starta han på benken, men kom inn i andre omgang.

– Kva er viktigast, Bjørdal: Seriegull eller vidare spel i Meisterligaen?

– Sjølvsagt vil me vinna Eliteserien. Men det er ein vanskeleg balansegang fordi me vil visa oss fram i Meisterligaen også. Målet er å prestera på begge arenaer, men heimleg liga er viktigast.

I Meisterliga-kampen mot Aston Villa blei sentrale Viking-spelarar som kaptein Zlatko Tripic og spiss Erik Botheim tatt av bana ut i andre omgang.

Men Tripic går ikkje med på at det handlar om at heimleg Eliteserie er viktigast.

– Nei, det var tunge bein. Eg synest alle som kom inn gjorde Viking betre. Det krev mykje å spela borte i Europa, så det var gode innhopp.

Seriefinale i Bodø

På toppen av tabellen i Eliteserien står det nå heilt likt poengmessig mellom Bodø/Glimt og Viking.

Laget frå Bodø leiar tabellen med minst mogleg margin – med berre eit mål betre målforskjell enn laget frå Stavanger.

NRK-ekspert Torp er klar på at kampen mellom Glimt og Viking neste fredag blir seriefinalen.

– Eg vil nok seia at Bodø/Glimt er små favorittar til å ta gullet til slutt. Det handlar kanskje mest om at dei har levd i den verda dei er i nå med to kampar i veka, som er litt nytt for Viking.