Viking-keeper Arild Østbø brukar tre koffeintyggisar kvar kamp – dette meiner eksperten – NRK Rogaland – Lokale nyheter, TV og radio

«Alle gode ting er tre», heiter det i ordspråket.

Det gjeld i alle fall for Viking-keeper Arild Østbø når han spelar fotballkamp.

Dette er nemleg «tyggis-menyen» på kampdag:

• Ein tyggis til oppvarming.
• Ein tyggis til første omgang.
• Ein tyggis til andre omgang.

Altså tre tyggegummiar i kjeften per kamp for Viking-keeperen som kjempar om seriegull – og møter gullrival Bodø/Glimt i Bodø fredag kveld til det som blir omtala som årets kamp i Eliteserien.

Dei som har sett Viking i serie eller Meisterliga i det siste har nok også kanskje lagt merke til det: Ein målvakt som tygg seg gjennom heile kampen.

– Ja, det blir ein til oppvarming og ein i kvar omgang. Det blir tre i kvar einaste kamp, humrar Østbø når NRK spør han om den høge tygge-frekvensen under kamp.

– Kvifor må du ha tyggis når du står i mål?

– Det er litt koffein i tyggisen. Det hjelper på litt forskjellige ting.

– Det er rett og slett for å få energi?

– Ja, blant anna, forklarer Østbø.

Tatt av i England

Koffeintyggis blir brukt av fleire og trenden har tatt heilt av i Premier League-miljøet.

Ein studie viser nemleg at 97 prosent av profesjonelle fotballklubbar i England administrerer koffein til spelarane, ifølge The Athletic.

Landslagsprofil Kristoffer Ajer er blant fotballspelarane som tidlegare har stått fram som ein «tyggis-spelar» under kamp.

For handballkeeper Katrine Lunde har koffeintyggis vore eit fast ritual før kamp i mange år.

NRK sin fotballekspert, Carl-Erik Torp, seier ting som kan få deg til å prestera betre er noko alle spelarar leitar etter heile tida.

Han har så langt ikkje registrert ein «tyggis-trend» blant fotballspelarar i Noreg.

– Men om Østbø sjølv trur på det, vil det jo uansett ha ein positiv effekt på han, tenker eg.

Torp har sjølv ei spelarkarriere bak seg på det øvste nivået i Noreg, og har vore borti ein del som likar å spela med tyggis.

Det synest han sjølv er litt rart, spesielt blant utespelarar.

– Det blir nok litt annleis for ein keeper som ikkje løper like mykje og er involvert på ein annan måte. Samtidig er jo dei også i ein posisjon kor det i periodar kan vera svært lite å gjera. Då er det avgjerande at ein er hundre prosent klar for det som skjer heilt plutseleg.

Ekspert: – Svært liten effekt

Hans Kristian Stadheim har skrive doktorgrad ved Norges idrettshøgskule om effekten av koffein på idrettsutøvarar. Han har også publisert fleire vitskapelege artiklar om temaet.

– Forsking viser at koffeintyggis kan gi ei lita prestasjonsforbetring. Du kan samanlikna det med placeboeffekt, seier mannen med doktorgrad i fysiologi.

Stadheim viser til studiar med nesten 400 deltakarar som såg på koffeintyggis opp mot placebo. Resultatet blei ein effektstorleik på rundt 0,2.

– Det er det me kallar ein svært liten effekt. Effekten er høgare ved å ta inn koffein gjennom piller eller drikke, konkluderer Stadheim.

– Det er fort små marginar som avgjer gullkampen mellom Viking og Glimt. Kan koffeintyggisen til Viking-keeperen bli avgjerande?

– På generelt grunnlag så aukar koffein konsentrasjonsevna. Det kan vera at du klarer å halda fokus og redda eit skot eller liknande som gjer at du avverjar mål. Teoretisk sett, er svaret ja.

Keeperduell i gullspurten

Ein ting er effekten av koffeintyggis, noko anna er tryggleiken til spelarane.

Viking-keeper Østbø er ikkje redd for at all tyggisbruken skal gjera at han tygg av seg tunga eller medføra uhell på andre måtar når kan kastar seg etter ballen.

– Nå har eg togge så mykje at eg er godt vane med det. Men det har hendt at eg har svelgt nokon, flirer Østbø.

Gullkampen i Bodø fredag kveld blir også ein keeperduell mellom to av Eliteserien sine beste keeperar, Arild Østbø i Viking-målet og Nikita Haikin i Glimt-buret.

Dei to keeper-profilane har eit like bra snitt når det gjeld mål slept inn per 90 spelte minutt i Eliteserien med 0,8. Det er det beste snittet i serien, ifølge statistikksida FotMob.

Men Østbø har ein litt betre redningsprosent med sine 78,4 prosent (best i Eliteserien), medan Haikin står med 75 prosent så langt i sesongen.

– Keeperduellen er interessant i innspurten. Det er jo ein ekstremt utsett posisjon, så det handlar jo ikkje berre om å redda den eine viktige sjansen, men unngå å gjera feil. Gullet kjem til å bli avgjort på små marginar, seier fotballekspert Carl-Erik Torp.