Speler om sølv eller sjansen til å tene 200 millionar kroner – NRK Rogaland – Lokale nyheter, TV og radio

– Det er ein kamp som har stor sportsleg betydning, men det er også ein kamp om veldig mykje pengar, seier Tor Geir Kvinen.

Han er ekspert på fotballøkonomi.

Faktisk står det over 200 millionar kroner på spel på søndag.

For første gong på veldig lenge får to eliteserielag spele Mesterliga-kvalifisering.

– Det er veldig stor forskjell på å komme ut i Europa og det verkeleg flotte økonomisk då er jo å hamne i Mesterligaen, seier Kvinen.

Ein milliard til vinnaren

For med ein plass i ligaspelet i Mesterligaen vankar det 217 millionar kroner. I tillegg får laga 24,5 millionar kroner per seier eller 8 millionar kroner per uavgjort i ligaspelet.

Vinnaren av heile Mesterligaen får elles nesten ein milliard kroner.

Til samanlikning hadde Viking ei omsetning på rett under 161,3 millionar kroner i 2023.

Brann hadde 228,7 millionar i omsetning i 2023, men det var det høgaste i klubben si historie.

– Både Brann og Viking kan i teorien vinne Eliteserien ganske overraskande, men å komme på andreplass gir ein større premie enn nokosinne, seier NRK sin sportskommentator Jan Petter Saltvedt.

Men for å komme til pengane må ein først vinne nokre fotballkampar.

Først og fremst kampen på søndag. Då får ein vere med i kvalifisering til Mesterligaen neste år.

Her ventar ein motstandar for vinnaren av Eliteserien og to til tre motstandarar for sølvvinnaren.

Direktør i Viking, Eirik Bjørnø, seier dei har alt å vinne til helga.

Pokal eller pengar

– Det er klart det er nokre kroner i premiepengar, men først og fremst er vi opptekne av at vi har nådd det målet vi sette oss før sesongen. Vi har eigentleg berre alt å vinne til helga, seier han.

Og legg til at han gler seg til å reise til Bergen og spolere festen til Brann.

– Skilnaden mellom Mesterligaen og Serieligaen er nesten 200 millionar?

– Eg har ikkje byrja å rekne eller tenke så mykje på akkurat det. Vi har fokus på å skape gode prestasjonar på søndag. Men eg skjønar at de i media synest det er veldig gøy å leike med tala, seier han og legg til:

– Pokal, augneblink og opplevingar. Det er det handlar om. Det er eit enormt fokus i desse dagar om alle desse pengane som kjem. Men vi må aldri gløyme at fotballen er til for å skape store augneblink i lag.

I Brann er dei også spente på moglegheitene for å spele i Mesterligaen neste år.

–Det vil bety mykje både sportsleg og økonomisk, seier dagleg leiar Christian Kalvenes i Brann.

– Andre plass i serien sikrar minst tre rundar med europacup i 2025, og gir gode moglegheiter for kvalifisere seg inn i eit gruppespel, held han fram.

Men draumen om gull i Bergen lever framleis, sjølv etter tapet mot Molde i helga.

Slår Brann Viking, og Bodø/Glimt speler uavgjort mot Lillestrøm, blir det gull til Brann.

37 millionar i mogleg «trøystepremie»

Men Bodø/Glimt er no den store favoritten til å ta sigeren i eliteserien.

– Alt ligg i våre hender, seier leiar for drift og økonomi i Bodø/Glimt Svein Tore Hansen.

– Champions League er det største sportsleg. Og så er det ein økonomisk gevinst, held han fram. Og med siger mot Lillestrøm går dei rett inn i playoffen.

Men det er først og fremst i gruppespelet at det ligg store pengar, seier Hansen.

Det laget som ikkje vinn på søndag, av Brann og Viking, tar moglegvis tredjeplassen i Eliteserien og får kvalifisering til Serieligaen.

Her er summane litt annleis.

Dei laga som kjem til ligaspel her får 37 millionar kroner, så gir kampane 5 millionar kroner per seier og 1,7 per uavgjort.

Men er det eigentleg så stor sjanse for at Noreg har lag i Mesterligaen neste år?

– Statistisk sett så skjer det snart. Særleg når vi har to lag som skal prøve seg, seier Saltvedt.

Flaks og ferdigheiter

Rosenborg har vore med i Mesterligaen heile elleve gonger. Sist i 2007-2008-sesongen. Molde er det einaste norske laget utanom som har vore med, dei i sesongen 1999–2000.

Men Molde var veldig nære i fjor. Og Bodø/Glimt har vore nær to gonger.

– Kor viktige er dei pengane?

– Får ein automatisk suksess ved å ha pengar? På ingen måte, men ein lukkast heller ikkje utan. Pengane gjer at du kan få dei beste til din klubb, i alle fall i ein periode og det gjer at du utviklar deg vidare og held fram med å kvalifisere deg til dei turneringane som gir endå meir pengar, seier Saltvedt.

Tor Geir Kvinen vil helst halde seg til pengane, men kor sannsynleg trur han det er at Brann eller Viking speler i Mesterligaen neste år?

– Då byrjar eg plutseleg å blande meg inn i sport, men ein er jo ofte både dyktig og heldig i fotball, seier han.