Mann sikta for drap i Sandnes – NRK Rogaland – Lokale nyheter, TV og radio

Ein mann i 20-åra er sikta for drap på ein mann i 50-åra i Sandnes. Det skriv politiet i ei pressemelding måndag morgon.

Den fyrste meldinga om ei alvorleg valdshending i Sandnes, kom til politiet via AMK klokka 04.02. Politiet rykka med ein gang ut til adressa.

– Mannen som no er sikta vart pågripen på staden, og det er sett i gang etterforskning, seier politiadvokat Christine Kleppa.

Fleire vitne avhøyrd

Etterforskninga er førebels i ei tidleg fase, og politiet opplyser at det er for tidleg å seie noko meir om sjølve hendingsforløpet.

Dei involverte har ein relasjon til kvarandre, og begge har ei tilknyting til den aktuelle adressa.

– Vi etterforskar saka breitt. Politiet har avhøyrd fleire vitne. Åstaden er sperra av og det vil pågå kriminaltekniske undersøkingar utover dagen. Det er for tidleg å gå inn på eventuelle beslag, da arbeidet er pågåande, seier Kleppa.

Det er sett opp sperreband frå politiet på eigedommen.