Warholm, Jæger og Jakob Ingebrigtsen løpar Diamond League i Silesia – NRK Sport – Sportsnyheter, resultater og sendeplan

Jakob Ingebrigtsen låg i teten med ein runde igjen, men hamna utanfor pallen på dagens løp.

Sigeren gjekk til amerikanske Ethan Strand som vant med 3.30,77. Ingebrigtsen fekk tida 3.31,19.

Phanuel Koech og Cole Hocker kom seg også framfor nordmannen

– Eg kjenner at farten er uvant høg. Det er ein stor kontrast å gå frå 5000 til 1500, sa 25-åringen etter løpet.

Ingebrigtsen fekk også skrubbsår på beina etter fleire duellar med kenyanske Phanuel Koech undervegs i løpet.

– Han skal liksom ta meg inn i svingen. Eg taper jo den kampen, ærleg nok. Så blir det litt å stange i han, og eg prøver å gå på utsida av han på oppløpet. Så skal han gå ut, og eg går inn. Litt sånn nybyrjarfeil.

– Det var bra, men eg sparka Ingebrigtsen. Det var sånn eg mista førsteplassen, sa Koech til VG om situasjonen.

Sist Ingebrigtsen sprang 1500 meter var under VM i Tokyo i september i fjor. Før og etter meisterskapen sleit han med akillesen, og i februar blei han operert.

– Litt rusten

Likevel stilte han til start i EM i Birmingham tidlegare denne månaden. Der tok han gull på 5000 meter i sitt første løp på nesten eitt år.

Dette var også hans første Diamond League stemne på over 700 dagar.

– Det var ein svært god start. Veldig godkjent, synest eg av Jakob det her. Han viser ein form som er solid og han viser at han er litt rusten taktisk, seier NRKs friidrettskommentator Vebjørn Rodal.

Og at det framleis er litt rust i motoren, var hovudpersonen sjølv heilt einig i:

– Det er litt rustent maskineri, men viss eg tvingar det i gang, så kjem det på ein måte litt. Når det er 600 meter igjen, så er det kanskje ikkje så tungt som det følast, seier Ingebrigtsen etter løpet.

– Eg har ikkje heilt siste kicket når vi har eit par akselerasjonar på bortre langside og i siste sving. Men det er ein god start. Gi meg fire dagar til, så har eg det, legg han til.

Om fire dagar spring Ingebrigtsen Diamond League-stemnet i Zürich, før han også skal vere med i nyvinninga The Ultimate Championship i Budapest i september.

Slått av rivalen igjen

Første gang sidan juni møttest Alison dos Santos og Karsten Warholm igjen under Diamond League i Silesia.

Karsten Warholm sprang inn til 46,52 på 400 meter hekk. Det heldt til andreplass – Alison dos Santos vann på 46,43, ei tid som var god nok til årsbeste.

– Kva skal ein seie, det er kanskje det nærmaste eg har vore i år. Eg trudde eg faktisk hadde han på siste hekken. Sjølvsagt er det litt bitter, eg er konkurransemenneske, sa Warholm etter løpet.

Det var brasilianaren sin fjerde siger mot Warholm denne sesongen.

– Det var bra. Det er viktig å vinne og å ha gode tider, sa dos Santos etter løpet.

– Trur du at du irriterer Warholm litt no?

– Ja, han har snakka om meg på dei siste pressekonferansane og den kampen vi har hatt i år. Det er spennande. Eg har vore i hans posisjon før, der eg har sprunge veldig bra, men blitt nummer to. Eg kjenner følelsen.

– Ein sliten Jæger

Henriette Jæger blei nummer sju på 400 meter i Diamond League i Silesia. Ho sprang inn til 49,85 – den ellevte raskaste tida i karrieren. Marileidy Paulino vant løpet med 48,87.

– Det er ein sliten Jæger som ikkje makter å kjempe om ein pallplass den gangen, sa NRK friidrettskommentator Jann Post.

– Det var ikkje eit så veldig bra løp, verken tida eller gjennomføringa. Det er ein del av spelet, ein kan ikkje berre ha toppløp heile tida, sa Jæger om dagens prestasjon.

Jæger tok gull både på 4x 400 meter stafett og 400 meter i EM, og har innrømde at det har «vore litt mykje» den siste tida.

– Det har påverka meg, men eg må jobbe med at det ikkje skal gjere det også, for det kan komme sånne situasjonar seinare i karrieren min også, seier ho.

Sesongen er ikkje over for 23-åringen. Ho skal både løpe Diamond League-finalen og nykommaren The Ultimate Championship i Budapest i september.

Guttormsen med pallplass

Sondre Guttormsen skuffa stort i EM. No har han sikra ein pallplass i Polen.

Han hadde ikkje eit einaste riv og tangerte utandørsrekorden sin då han gjekk over seks meter på første forsøk. Innandørs har Guttormsen før hoppa 6.06.

Etter tre strake riv på 6,10 meter måtte 27-åringen sjå seg slått av lista. Men han klarte likevel å sikre ein pallplass i Polen, då han tok ein delt andreplass med Emmanouil Karalis. Armand Duplantis tok sigeren.

– Han skal vere strålande fornøgd tenke eg, med nok eit resultat på seks meter. Det er utruleg sterke namn som han legg bak seg her, sa friidrettskommentator Vebjørn Rodal.