Åtte kampar på fire veker – NRK Rogaland – Lokale nyheter, TV og radio

– Eg får gåsehud berre du spør meg, seier Per Egil Hagen.

Denne hausten skal han reise Europa rundt for å følge Viking. Første stopp er Bergen og Brann – etter kvart ventar Sevilla, Bayern og Madrid.

– Eg synest berre det er heilt sinnssjukt at eg får lov til å oppleve dette.

For det er mykje å oppleve denne hausten om du er Viking eller Glimt-supporter.

Eit nådelaust kampprogram gir lite tid til at verken supporterar eller spelarar kan kvile mellom slaga.

Krevjande for spelarar og familiar

– Nå handlar det mest om å spele kampar, og restituere godt mellom kampane, seier Viking-kaptein Zlatko Tripic.

Etter landslagspausen er det fullt køyr igjen, med åtte kampar på fire veker for dei mørkeblå.

– Det blir ein tøff månad, ikkje berre for oss i Viking, men også for familiane. Det er ikkje så mykje dei får sjå til oss denne månaden, seier Viking-trenar Morten Jensen.

– Men slik er det. Vi har kvalifisert oss for det gjævaste selskapet, og då får vi gjere det vi kan for å konkurrere både i Eliteserien og Meisterligaen.

Ikkje berekraftig over tid

Med ni kampar igjen av sesongen står både Bodø/Glimt og Viking med 50 poeng.

Dei to laga knivar om førsteplassen i eliteserien, samtidig som begge tøffe oppgjer i Meisterligaen.

Bodø/Glimt møter også eit knallhardt kampprogram dei neste vekene, med oppgjer mellom anna mot Napoli og Borussia Dortmund.

Laget skal spele heile fem kampar på 15 dagar, og Glimt-trener Kjetil Knutsen har mellom anna uttrykt bekymring for det heftige kampprogrammet.

– Det er tøft og utfordrande, men vi må berre optimalisere alt som går på restitusjon og søvn, har Knudsen tidlegare sagt til NRK.

– Fotballen må bli betre til å ta vare på helsa til spelarane. Det kampkøyret dei står i, vil ikkje vere berekraftig over tid.

Glimt-spiss Andreas Helmersen har på si side vist liten uro for den høge kampbelastninga.

– Eg har gjort mykje riktig, så eg trur det skal gå helt fint.

Kjem ikkje til å bruke det unnskylding.

Viking-trenar Morten Jensen er også mindre uroa for slitasje på spelarar.

– Eg forstår det når ein snakkar om Haaland og det kaliberet der, som har ekstremt mange kampar i Premier League, ulike cupar og går langt inn i Meisterligaen. Men eg ser ikkje heilt utfordringa for våre gutar, seier Jensen.

– Vi har ein stor stall som er rigga for dette, og det er ikkje så mange kampar i Meisterligaen vi skal spele. Det er vel fem til, og så er det vinterpause og eliteserien er over.