Saka er oppdatert med ny informasjon søndag.
Laurdag ettermiddag klokka 15.43 rykte politiet ut med fleire patruljar til ei adresse på Tjensvoll i Stavanger, etter melding om ei alvorleg valdshending.
Ein mann i 30-åra blei funnen med alvorlege skadar og frakta til Stavanger universitetssjukehus (SUS), der han framleis er innlagd.
Laurdag kveld arresterte politiet ein mann i 30-åra på ein buss. Han blei sikta for drapsforsøk.
Søndag morgon seier politiet at mistanken mot han er svekt, og at ein annan person er pågripen i samband med valdshendinga.
– Det er etterforskinga gjennom kvelden i går og i natt som har leitt fram til det. Politiet har avhøyrt han, og vi har avhøyrt andre vitne. Det er ei samla vurdering, seier politiadvokat Fredrik Martin Soma til NRK søndag.
Er mannen framleis sikta i saka?
– Han er framleis sikta, men mistanken mot han er svekt, seier Soma.
Ny person sikta i saka
Politiet seier søndag morgon at dei har pågripe ein ny person i samband med hendinga.
– Politiet arresterte ein ny person seint laurdag kveld. Vedkommande er sikta for forsøk på drap. Den sikta er ein mann i tjueåra, seier politiadvokat Fredrik Martin Soma søndag morgon.
– Det er forklaringar frå vitne, og observasjonar gjort av politiet som har leidd fram til pågripinga av han, held han fram.
Mannen har ikkje gjennomgått avhøyr.
Av omsyn til etterforskinga vil ikkje politiet si noko om hendingsforløpet, eller om det er nytta våpen.
Det skal ha vore fleire personar som var vitne til hendinga.
Framleis innlagd på sjukehus
Politiet seier at dei vil gjere eit forsøk på å gjennomføre avhøyr med den fornærma mannen i dag.
– Det føreset at han er i stand til å snakke med politiet. Han har alvorlege skadar og er framleis innlagd på sjukehus, seier politiadvokat Soma.
Politiet vil ikkje gå i detalj om det finst ein relasjon mellom fornærma og dei to sikta mennene.
Publisert
Oppdatert
