– Etter at Offshore Norge gjekk til lockout, laurdag morgon har det ikkje vore kontakt mellom partane, stadfestar kommunikasjonsleiar i Offshore Norge, Kolbjørn Andreassen.
Han reknar med at lockouten blir langvarig. Årsaka er at den ikkje får utslag i første omgang på produksjon av olje eller gass.
– Derfor blir konsekvensane for samfunnet relativt små, og derfor er det ikkje truleg at regjeringa grip inn med tvungen lønsnemnd i første omgang, seier Andreassen.
– Så kvifor gjekk de til det skrittet å erklæra lockout?
– Det er fordi me ønskjer ei avklaring så snart som råd. Alternativet var ei endå meir langvarig kontlikt, seier kommunikasjonsleiaren i Offshore Norge.
Konsekvensane hittil er at streiken og lockouten fører til forseinkingar og stans i boreoperasjonar på sokkelen. Fire IMR-fartøy, eitt brønnintervensjonsfartøy og to boreriggar har alt stansa aktiviteten, skriv Offshore Norge i ei pressemedling.
Forhandlingsleiar for fagforeninga SAFE, Kai Morten Anda, stadfestar at det ikkje har vore kontakt mellom partane sidan laurdag føremiddag.
